Author: The Everest Post

भानुभक्त आचार्य

कैलाली । सुदूरपश्चिम प्रदेश सरकारले बुधबार राष्ट्रिय प्रजातन्त्र दिवस भव्य समारोहकाबीच मनाएको छ ।
राष्ट्रिय प्रजातन्त्र दिवस मूल समारोह समितिको आयोजनामा आन्तरिक मामिला तथा कानुन मन्त्रालय भएको कार्यक्रममा अध्यक्षता सुदूरपश्चिम प्रदेश सरकारका मुख्यमन्त्री कमल बहादुर शाहले गरेका थिए । प्रमुख अतिथि प्रदेश प्रमुख नजिर मियाँ थिए ।
प्रदेश सरकारले नै मनाएको उक्त कार्यक्रममा प्रदेश सरकारका मन्त्री र सांसदहरूको भने झिनो उपस्थिति रहेको थियो । सभामुख भीम भण्डारी कार्यक्रममा सहभागी हुँदा उपसभामुख कोइली देवी चौधरी देखिइनन् ।
एमालेका पूर्व मुख्यमन्त्री राजेन्द्रसिंह रावल, भौतिक पूर्वाधार विकास मन्त्री सुरेन्द्र पाल, भूमि व्यवस्था कृषि तथा सहकारी मन्त्री विरबहादुर थापा र अन्तरिक मामिला मन्त्री सहभागी हुँदा कांग्रेस र नागरिक उन्मुक्ति पार्टी कुनै पनि मन्त्री र राज्यमन्त्री कार्यक्रममा सहभागी भएनन् ।

सुदूरपश्चिम प्रदेश सरकारमा कांग्रेसको तर्फबाट आर्थिक मामिला मन्त्री बहादुर थापा, सामाजिक विकास मन्त्री  मेघराज खड्का सहभागी छन् । उनीहरु दुबै मन्त्री कार्यक्रममा आएनन् । त्यस्तै कांग्रेसको तर्फबाट अर्थ राज्यमन्त्री भएका प्रकाश बम र  सामाजिक राज्यमन्त्री भएकी सरस्वती खड्का पनि कार्यक्रममा आइनन् ।
काङ्ग्रेसबाट मुख्यमन्त्री भएका शाहकै अध्यक्षतामा आयोजना भएको प्रदेश सरकारको कार्यक्रममा काङ्ग्रेसकै सबै मन्त्री अनुपस्थितिको विषयले अहिले चर्चा पाएको छ । मुख्यमन्त्री निकट स्रोतले भने मन्त्रीहरूको अन्य कार्यक्रम भएको हुँदा प्रजातन्त्र दिवसको कार्यक्रममा उपस्थित हुन नसकेको जनाएको छ ।
‘सामाजिक विकास मन्त्री  ज्यू अछामको कार्यक्रममा र राज्यमन्त्री ज्यू डडेल्धुराको कार्यक्रममा हुनुहुन्छ ’ मुख्यमन्त्रीका प्रमुख स्वकीय सचिव प्रयागराज खनालले भने, ‘अर्थमन्त्री ज्यूको बुवा बिरामी र अर्थ राज्यमन्त्री ज्यू आफै बिरामी भएको हुँदा आउन नसक्नु भएको हो । ’

कार्यक्रममा भौतिक पूर्वाधार राज्यमन्त्री निर्मला साउद पनि आइनन् । उनले आफू जिल्लाको कार्यक्रमको लागि डोटी आएको हुँदा कार्यक्रममा उपस्थित हुन नसकेको बताइन्

नागरिक उन्मुक्ति पार्टीको तर्फबाट उद्योग पर्यटन वन तथा वातावरण मन्त्री लक्ष्मणकिशोर चौधरी पनि सरकारमा छन् । तर, उनी पनि कार्यक्रममा आएनन् । ‘म काठमाडौँबाट ढिलो आए त्यहि भएर कार्यक्रममा पुग्न सकिन ’ उनले भने ।
सुदूरपश्चिम सरकारका मन्त्री मात्रै होइन कार्यक्रममा प्रदेश सभा सदस्यहरूको पनि उपस्थिति निकै कमजोर रहेको थियो । ५३ जना प्रदेश सभा सदस्य रहेकोमध्ये कार्यक्रममा चार सांसद मात्रै थिए ।  पाँच वटा विषयगत समिति मध्ये एक जना मात्रै सभापति कार्यक्रममा उपस्थित थिए ।

५३ जना मध्ये विशेषाधिकार समिति सभापति समेत रहेकी कांग्रेस सांसद तुलसी देवकोटा, एमालेकी जानकी ऐर बम , माओवादी जानकी देवी कुवर कार्यक्रममा उपस्थित थिइन् । ढिलो गरेर एमाले सांसद दमन भण्डारी पनि कार्यक्रममा उपस्थित भएका थिए ।

पूर्व मुख्यमन्त्री मध्ये राजेन्द्रसिंह रावल मात्रै कार्यक्रममा थिए । दीर्घ सोडारी र त्रिलोचन भट्ट कार्यक्रममा आएनन् । कार्यक्रममा जनप्रतिनिधि भन्दा कर्मचारीको संख्या निकै बढि थियो ।
प्रजातन्त्र स्थापनाको अवसर प्रदेशमा आयोजना गरिएको महत्त्वपूर्ण कार्यक्रममा सरकारकै अधिकांश मन्त्री र सांसद उपस्थित नभएपछि अहिले मन्त्री र सांसदले प्रजातन्त्र दिवसलाई महत्त्व नदिएका हुन् कि भन्ने विषय पनि उठ्न थालेको छ ।

‘प्रतिपक्षको कुनै नेता देखिएन । हतारिएर दिवस मनाउनु हुँदैन’ नेकपा एमाले संसदीय दला नेता समेत रहेका पूर्व मुख्यमन्त्री राजेन्द्रसिंह रावल भन्छन्, ‘प्रभात फेरि गरेर कर्मचारी जम्मा भएर पुरानै पञ्चायती ढङ्गको कार्यक्रम गर्नु हुँदैन । सहिदहरूको स्मरण गर्नु पर्ने थियो । आज ती विषयहरू खड्किएका थिए । ’
उनले कार्यक्रममा सरकारको तर्फबाट पर्याप्त मन्त्रीहरूको उपस्थित नहुँदा र सांसदहरू पनि पर्याप्त नआउँदा प्रजातन्त्र दिवसलाई महत्त्व नदिएको झल्को देखिएको बताए ।

‘सूचना नपाउँदा वा अन्य कार्यक्रमले गर्दा पनि उपस्थिति कम भएको हुनसक्छ’ उनले भने ‘मुख्यमन्त्री नै अध्यक्षता ग्रहण गर्ने कार्यक्रमलाई अझै तयारी गरेर, छलफल गरेर गर्नु पर्छ । ’ आन्तरिक मामिला तथा कानुन मन्त्रालयले मन्त्रीहरूलाई समयमै जानकारी गराएको जनाएको छ ।

‘बिहानको कार्यक्रममा सबै मन्त्री ज्यूहरूलाई निमन्त्रणा गरिएको थियो ।  राज्यमन्त्री ज्यूहरूलाई पनि जानकारी गराएर निमन्त्रण गरेका थियौँ तर, उहाँहरूको उपस्थिति निकै कम देखियो ’ आन्तरिक मामिला तथा कानुन मन्त्रालयका सूचना अधिकारी दीपेन्द्रसिंह विष्टले भने, ‘प्रदेश सभा सदस्य ज्यूहरूलाई कार्यक्रममा उपस्थित गराइदिन भन्दै प्रदेश सभा सचिवालयमा पत्र पठाएका थियौँ ।

प्रदेश सभा सचिवालयले पनि सबै सांसदहरूलाई समयै जानकारी गराइएको बताएको छ । ‘सबै सांसदहरूलाई एसएमएस  मार्फत जानकारी गराउन भनेको थिए’ प्रदेश सभा सचिवालयका सचिव देवबहादुर बोगटीले भने ।

मुख्यमन्त्रीको अध्यक्षतामा राष्ट्रिय प्रजातन्त्र दिवस मनाउन मूल आयोजक समिति गठन गरिएको थियो । सभामुख, उपसभामुख, सबै मन्त्री , राज्यमन्त्री र प्रदेश सभा सदस्य त्यसको सदस्य थिए । तर, बुधबारको कार्यक्रममा अधिकांश सदस्य नै उपस्थित भएनन् ।

धनगढी। सुदूरपश्चिम प्रदेश मुख्यमन्त्री कमलबहादुर शाहले प्रदेश सरकारले प्राथमिकताका आधारमा विकास निर्माणको काम गरिरहेको बताएका छन् ।

कैलारी गाउँपालिका–२ उजलीसेमरमा रहेको श्री राष्ट्रिय माध्यमिक विद्यालयको ६३ औं वार्षिकोत्सवको उद्घाटन गर्दै उनले यस्तो बताएका हुन। मुख्यमन्त्री शाहले विकास निर्माणको पहिचान गर्न आवश्यक रहेको औंल्याउँदै भने,“बढीभन्दा बढी जनता जोडिने र प्रतिफल दिने कार्यका लागि हामी एक ठाउँमा हुनुपर्दछ।”

प्रदेश सरकारले शैक्षिक क्षेत्रमा सुधारको प्रयास गरिरहेको उनको भनाइ थियो। सरकारले बजेट निर्माण गर्ने बेलामा शिक्षण क्षेत्रको संरचना निर्माणका लागि थुप्रै माग आउने गरेको उल्लेख गर्दै उनले सरकारले आवश्यकता र प्राथमिकताका आधारमा बजेट दिने गरेको बताए। “आवश्यकता कहाँनिर छ, तत्काल हामीले सम्बोधन गर्नु पर्ने कुन हो ?

विद्यार्थी, शिक्षकको चाप, पठनपाठनको स्तर हेरेर सरकारले बजेट दिने गरेको छ”, मुख्यमन्त्रीले भने । मुख्यमन्त्री शाहले प्रदेश सरकार एउटा मापदण्ड बनाएर अगाडि बढेको उल्लेख गरे।

सीमित स्रोत, साधनको बिच राज्यले शैक्षिक क्षेत्रको निरन्तर विकास गरिरहेको उनको भनाइ थियो। विद्यालय व्यवस्थापन समितिका अध्यक्ष नविन बोहराको अध्यक्षतामा भएको कार्यक्रममा जिल्ला समन्वय समितिका सभापति टीकादेवी चौधरी भुल, कैलारी गाउँपालिकाका अध्यक्ष राजसमझ चौधरी लगायतले बोलेका थियो। यसैबिच, मुख्यमन्त्री शाहले विद्यालयको छात्रावासको पनि उद्घाटन रेका छन् ।

काठमाडौँ । आगामी चैत्र ५ गते हुने स्ववियु निर्वाचनमा रत्न राज्य लक्ष्मी (आरआर) क्याम्पसको स्ववियु सभापतिमा हर्क बोहराले स्वतन्त्र उम्मेदवारी दिने घोषणा गरेका छन्। डोटी जिल्लाका बोहरा अहिले आरआर क्याम्पसमा स्नातक चौथो वर्षमा अध्ययनरत छन् र स्ववियु निर्वाचनमा राजनीतिक पूर्वाग्रहभन्दा बाहिर रही भाग लिने निर्णय गरेका हुन्।

हर्क बोहरा स्वतन्त्र विद्यार्थी युनियनको औचित्य, अवधारणा र मान्यतालाई अनुसरण गर्दै उम्मेदवारी दिने बताउँछन्। उनले यस निर्वाचनमा भाग लिने मुख्य उद्देश्य विद्यार्थीहरूको हकहित र विकासमा ध्यान दिनु रहेको बताएका छन्। ’विश्वविद्यालयलाई स्वसाधित संस्थाको रूपमा अगाडि बढाउँदै विश्वविद्यालयको शिक्षा प्रणालीलाई थप व्यवस्थित बनाउनु पर्छ’ बोहराले भने।

’स्वतन्त्र उम्मेदवारका रूपमा मेरो उम्मेदवारी राजनीतिक दलहरूको प्रभावबाट बाहिर राखेर, केवल विद्यार्थीहरूको वास्तविक समस्या र मागहरूमा ध्यान दिने उद्देश्यका साथ अगाडि बढ्दै छुु हर्क बोहराले आफ्नो उम्मेदवारी घोषणा गर्दै भने, ’स्ववियुको मुख्य उद्देश्य राजनीतिक स्वार्थभन्दा विद्यार्थीहरूको समस्यालाई प्राथमिकता दिनु हो।’

बोहरा क्याम्पसका विद्यार्थीहरू बीचमा निकै प्रिय र लोकप्रिय रहेका छन्। उनी धेरै वर्षदेखि विद्यार्थीहरूको समस्यामा सक्रिय रूपमा संलग्न रहेका छन् र हरेक सन्दर्भमा आफ्ना विचार र अभिव्यक्तिहरू प्रकट गर्दै आएका छन्।

’स्ववियु निर्वाचनमा मेरो उम्मेदवारीले विद्यार्थीहरूको बीचमा नयाँ दृष्टिकोण र विचार ल्याउने विश्वास गरिएको छ’ हर्क बोहराले भने। उनले आगामी निर्वाचनलाई विद्यार्थीहरूको भविष्य र शिक्षा सुधारको अवसरका रूपमा हेरिरहेको बताए।

’यस निर्वाचनमा उम्मेदवारको चयन मात्र नभई, विद्यार्थीहरूको लागि राम्रो नेतृत्व र भविष्य निर्माणको अवसर पनि हुनेछ’ बोहराले थपे। उनले विद्यार्थीहरूको सशक्तिकरण र शिक्षाको स्तर सुधारमा सक्रिय भूमिका खेल्ने आफ्नो प्रतिबद्धता व्यक्त गरे।

काठमाडौं । प्रधानमन्त्री केपी शर्मा ओलीले प्रविधिको प्रयोगबाटै उत्पादन र विकास निर्माणको कामलाई तिव्रता दिनुपर्ने बताएका छन् ।

सोमबार लुम्बिनी प्रदेशसभाको बैठकलाई सम्बोधन गर्ने क्रममा उनले यस्तो बताएका हुन् । ‘आइटी र प्रविधिको प्रयोग गर्छौं । उत्पादन, विकास र सुविधाका लागि प्रविधिको समेत प्रयोग गरेर विकास निर्माणलाई तिव्रता दिन्छौं,’ प्रधानमन्त्री ओलीले भने ।

उनले कम खर्च बढी लाभ दिनेगरी प्रविधिको प्रयोग गर्ने पनि बताए । ‘हामीले आफ्नो मनोवललाई उच्च राखौं । हामी गर्न सक्छौं । कुनै पनि देश अर्काले आएर बनाइदिँदैन,’ प्रधानमन्त्री ओलीले भने ।

प्रविधिको प्रयोग गरेर आधुनिकतातर्फ छिटो अगाढि बढ्न सक्ने उनले बताए ।

‘हामीले प्रयोग गर्ने ल्याकत अलिकति विकास गर्नुपर्छ । मोबाइल सबैको हातमा छ, मोबाइलको कसरी प्रयोग गर्ने भन्नेमात्रै हो,’ प्रधानमन्त्री ओलीले भने ।

कैलाली । सुदूरपश्चिम प्रदेशका चार वटा संसदीय समितिका सभापतिहरूले पद तथा गोपनीयताको शपथ लिएका छन् ।
ज्येष्ठ सदस्यको भरमा रहेका यहाँका सामाजिक विकास समिति, सार्वजनिक लेखा समिति , अर्थ विकास तथा प्राकृतिक स्रोत समिति  र  विशेषाधिकार समितिले आज सभापति पाएको हो । शनिवार सबै समितिमा एक एक जनाको मात्रै उम्मेदवारी परेको थियो ।चार वटै समितिमा चार जनाको मात्रै उम्मेदवारी परे पनि आइतबार मात्रै उनीहरु निर्वाचित भएको घोषणा गरिएको हो  ।

सामाजिक विकास समितिमा नेकपा एमालेका धर्मराज पाठक, सार्वजनिक लेखा समितिमा माओवादीका अक्कल रावल, अर्थ विकास तथा प्राकृतिक स्रोत समितिमा नागरिक उन्मुक्ति पार्टीका घनश्याम चौधरी र विशेषाधिकार समितिमा कांग्रसेकी तुलसी देवकोटालाई सोमबार सभामुख भीम भण्डारीले पद तथा गोपनीयताको शपथ खुवाएका थिए ।

पुस ११ मा सत्तारुढ दल नेपाली कांग्रेस र नेकपा एमालेबीच विषयगत समितिको सभापतिमा भागबन्डा भएको थियो ।  सत्ता गठबन्धनमा भएको भागबन्डा अनुसार दलहरूले आफ्ना उम्मेदवारलाई सम्बन्धित समितिमा उम्मेदवारी दिन लगाएका थिए ।

सुदूरपश्चिम प्रदेशका सबै संसदीय समितिमा यसअघि नै निर्वाचन भएर सभापति चयन भइसकेको थियो, तर विधायन तथा प्रदेश मामिला समितिबाहेकका तीन समितिका सभापतिलाई नै मन्त्री अवसर आएर मन्त्री भएपछि ती समिति ज्येष्ठ सदस्यको भरमा चलिरहेका थिए । विधायन तथा प्रदेश मामिला समितिमा भने देवानसिंह विष्ट सभापति छन् ।

कामले गति पाउने दाबी
करिब एक वर्षपछि समितिले सभापति पाएपछि नव  निर्वाचित समिति सभापतिहरूले अब समितिको कामले गति पाउने दाबी गरेका छन् ।

सामाजिक विकास समितिमा लामो समय सदस्य भएर काम गरिरहेको भन्दै अब सभापति भएर काम गर्दा अझै प्रभावकारी ढंगले काम हुने सभापति धर्मराज पाठक बताउँछन् । कानुन निर्माण गर्ने, आफ्नो क्षेत्राधिकार भित्र परेका विषयहरूमा देखिएका समस्याहरू हल गर्ने र निगरानी गर्ने आफ्नो पहिलो दाइत्व रहेको उनको भनाइ छ ।

‘कानुन निर्माण गर्ने, संसदीय निगरानी गर्ने र सरकारले गरेका कामको अनुगमन गर्ने हाम्रो दाइत्व हो ’ उनले भने, ‘शिक्षा, स्वास्थ्य, कृषि, भूमि सुधार जस्ता बिषयमा आवश्यक पर्ने नीति निर्माण गर्ने  र सरकारले ती  क्षेत्रमा गरिरहेका कामहरू प्रभावकारी भए नभएको विषयमा पहल गर्छु । ’

उनले विगतमा समितिले गरिरहेको काम अझै प्रभावकारी हुने र फलदायी हुने विश्वास व्यक्त गरे ।सार्वजनिक लेखा समितिको सभापति निर्वाचित भएका प्रमुख प्रतिपक्षी दल नेकपा माओवादी केन्द्रका अक्कल रावलले पनि आफूले पाएको जिम्मेवारी कुशलता पूर्वक निर्वाह गर्ने बताएका छन् । अघिल्लो कार्यकाल पनि सांसद रहेका रावल प्रदेश सरकारको मन्त्री समेत भइसकेका छन् । माओवादीका उपनेता रहेका रावलले अब प्रदेश सरकारले गरिरहेको आर्थिक पाटोमा बढि निगरानी गर्ने र सुशासन कायम गर्न भूमिका खेल्ने बताएका छन् ।

‘प्रदेश सरकारको बजेट र कार्यक्रमहरूको विषयमा निगरानी गर्ने, प्रदेश सरकारलाई ठिक ढंगले अगाडी बढाउन निगरानी गर्ने जिम्मेवारी छ । समस्याहरूलाई समाधान गर्ने, राम्रो कामको प्रोत्साहन गर्ने, कानुन विपरीत भइरहेको कामहरूलाई रोक्छौँ ’ उनले भने, ‘हाम्रो समितिमा सबै दलहरूको प्रतिनिधित्व छ । सुदूरपश्चिमको विकास निर्माणमा आएका समस्याहरू साझा ढंगले हल गर्ने छौँ ।’

अर्थ विकास तथा प्राकृतिक स्रोत समितिका सभापति घनश्याम चौधरी र विशेषाधिकार समितिको सभापति तुलसी देवकोटाले पनि आफ्नो क्षेत्राधिकार भित्रको काम प्रभावकारी ढंगले गर्ने जनाएका छन् ।