Author: The Everest Post

कैलाली । नेपाली कांग्रेसको सुदूरपश्चिम प्रदेशको सम्मेलन धनगढीमा सुरू भएको छ । पार्टी सभापति शेरबहादुर देउवाले उद्घाटन गरेको सम्मेलनमा प्राय: शीर्ष सबैजसो नेता उपस्थित छन् । तर, शेखर कोइराला भने आएनन् ।

सम्मेलनमा सभापति देउवासँगै उपसभापति पूर्णबहादुर खड्का, महामन्त्री गगनकुमार थापालगायतको उपस्थिति छ । नेताहरू डा. शशाङ्क कोइराला, कृष्ण सिटौला, गोपालमान श्रेष्ठ, वीरबहादुर बलायर, डिना उपाध्यायलगायत पनि धनगढी आएका छन् ।

१४औं महाधिवेशनमा सभापतिमा देउवासँग पराजित कोइरालाले आगामी महाधिवेशनमा पनि सभापतिको प्रमुख दाबेदारको रूपमा आफूलाई उभ्याइरहेका छन् । उनी पछिल्लो समय कांग्रेसका भेला र सम्मेलनहरू प्रति रुष्ट छन् ।

यसअघि पोखरा र लुम्बिनीमा भएको प्रशिक्षण कार्यक्रममा पनि अधिकांश नेता पुग्दा उनी गएनन् । उनले कहिँ निम्तो नगरिएको त कहिँ आधिकारिक व्यक्तिबाट खबर नआएको बताएका थिए ।

सुदूरपश्चिम प्रदेशमा भने आमन्त्रण गर्दा पनि नआएको प्रदेश महामन्त्री मेघराज खड्काले बताए ।

‘हामीले निम्तो पनि दिएका थियौँ फोन पनि गरेका थियौँ तर, उहाँ (शेखर कोइराला) आउनुभएन ’, उनले भने ‘किन आउनु भएन भन्ने कुरा त उहाँलाई नै थाहा होला ।’

कैलाली । माओवादी अध्यक्ष पुष्पकमल दाहाल ‘प्रचण्ड’ ले पटक-पटक दिएको लिखित तथा मौखिक निर्देशन कार्यान्वयन गर्न पहिलो पटक सुदूरपश्चिम प्रदेशमा माओवादी संसदीय दलमा छलफल भएको छ । अघिल्लो वर्ष माघ १२ गते बहुमतबाट खगराज भट्टलाई हटाएर मानबहादुर धामीलाई दलको नेता बनाइएपछि माओवादीमा विवाद सुरू भएको थियो । त्यसपछि माओवादी संसदीय दलको बैठक एउटा पक्षले सबै वहिष्कार गरिरह्यो ।

भट्टलाई हटाएर धामीलाई जिम्मेवारी दिँदा सभामुख बाहेकका १० सांसदमध्ये भट्टको पक्षमा ४ जना र धामीको पक्षमा ६ सांसद उभिएका थिए ।धामीको पक्षमा रहेका शिव ओली पनि अहिले भट्टको पक्षमा उभिएपछि ५\५ जना पुगेका छन् । अहिले भट्टको पक्षमा ओली सहित, झपट साउद, रमेश धामी, जानकी पौडेल कुँवर छन् । भने धामीको पक्षमा अक्कल रावल, ओमविक्रम भाट सरल, लक्ष्मी विक र गीता माल रहेका छन् । दुवै पक्षमा बराबरी भएपछि हेडक्वार्टरको निर्देशन पनि कार्यान्वयन हुन सकेको थिएन ।

यसैबीच आइतबार यो विषय समाधान गर्ने भन्दै माओवादीका सबै सांसद एक ठाउँमा बसे । रमेश धामी बैठकमा आएनन् । अरु सबै सांसदहरू अध्यक्ष प्रचण्डले दिएको निर्देशन कार्यान्वयन गर्ने पक्षमा उभिए । प्रचण्डले भट्टलाई दलको नेता बनाउन लिखित तथा मौखिक निर्देशन दिएका थिए । आइतबार अनौपचारिक छलफलमा आफूहरू अध्यक्षको निर्देशन कार्यान्वयन गर्ने पक्षमा रहेको तर, केही असहमतिका विषयहरू रहेको भन्दै धामीले विषय उठान गरेका थिए ।

‘दलको विषयमा टुङ्गो लगाउनु पर्छ । पहिलो पटक यसरी सबै सबेर सामूहिक छलफल भयो । राम्रो कुरा हो ’ धामीले भने, ‘केन्द्रको सर्कुलर कार्यान्वयन हुनुपर्छ तर, मेरा पनि केही विषयहरू छन् जुन सम्बोधन हुनुपर्छ ।’

धामीले केन्द्रमा पनि जिम्मेवारी भट्टलाई दिँदा आफूले पाउने जिम्मेवारीबारे प्रष्ट हुनुपर्ने भन्दै आइरहेका छन् । आफू संसदीय व्यवस्थाअनुसार चुनिएको दलको नेता भएको भन्दै पहिले आफ्नो व्यवस्थापन भएपछि मात्रै दलको नेता फेरिने अडानमा उनी छन् । आइतबार पनि उनले त्यही संकेत गरेका थिए ।

झपट साउँदले धामीका केही कुराहरूलाई सम्बोधन गर्दै अहिले ५ \५ जना सांसद लिएर कहिँ पुग्न नसकिने बताएका थिए ।

‘केन्द्रको सर्कुलर लागू गरौँ यसरी ५ \५ जना सांसद बोकेर हामी कहीँ पुग्दैनौँ’, उनले भनेका थिए ।

साउँदले अध्यक्ष प्रचण्डसँग यसअघि नै धामीले सिफारिस गरेका व्यक्तिहरू मन्त्री कायम हुने तर, भट्टलाई दलको नेता बनाउने गरी दिएको निर्देशन आफूहरूले मानेपनि धामी समूहले उल्लंघन गरेको बताएका थिए ।

‘त्यो बेला मन्त्री यथावत् राख्ने र दलको नेता फेर्ने सहमति भएको थियो त्यो पनि पूरा भएन’, उनले भने ।

जानकी पौडेल कुवरले साउँदकै कुरालाई समर्थन गरिन् । अक्कल रावलले विधिको कुरा प्रधान हुने टिप्पणी गरे । गीता मालले छलफल र संवादबाट विवाद टुङ्गो लगाउनु पर्नेमा जोड दिइन् ।

माओवादी सांसद ओमविक्रम भाट ‘सरल’ ले संसदीय दलको नेता फेरिने अवस्थामा सुदूरपश्चिम प्रदेशको इन्चार्ज पनि स्थानीयलाई नै दिनुपर्ने बताए ।

अहिले प्रदेश इन्चार्ज गिरिराजमणि पोखरेल छन् । धामी पक्षले भने इन्चार्ज पोखरेलबाट विभेदपूर्ण व्यवहार भइरहेको भन्दै इन्चार्ज फेर्नुपर्ने बताउँदै आइरहेको छ ।

भाटले इन्चार्ज फेर्ने विषय आफूले उठान गरे पनि यो धामी पक्षका पाँच सांसदहरूको साझा माग रहेको बताएका थिए । भाटले यसअघि १४ फागुनमा खुमल्टारमा पनि सुदूरपश्चिम प्रदेशको इन्चार्ज विना मगरलाई बनाउनु पर्ने प्रस्ताव अगाडि सारेका थिए ।

विनालाई इन्चार्ज बनाउँदा परिवारवादको आरोप लाग्ने अवस्थामा उनले लक्ष्मण जोशी, त्रिलोचन भट्ट वा जगत पार्कीमध्येबाट पनि इन्चार्ज बनाउन सकिने बताएका थिए ।

आइतबारको छलफलमा पनि सरलले सोही प्रस्ताव सारे । स्थानीय इन्चार्ज बनाउनुपर्ने उनको प्रस्तावमा केही सांसदले समर्थन गरेका थिए भने केहीले मौन समर्थन जनाएका थिए । केही सांसदले भने स्थानीय इन्चार्ज बनाउँदा पार्टी र संगठन बलियो हुने तर्क गर्दै संसदीय दलले भने नाम किटान गर्न नहुने बताएका थिए ।

सांसद लक्ष्मी विकले संसदीय दलको विवाद मिलाउन विगतका तिक्ततालाई अगाडि ल्याउन नहुने बताएकी थिइन् । ‘सबैलाई सहज हुनेगरी मिल्नु पर्छ । दीर्घकालीन सहज हुनेगरी विवाद टुङ्गो लगाउनु पर्छ’, उनले भनिन्, ‘पहिलेका कुरा ल्याएर फेरि विवाद गर्नुहुँदैन । ’

खगराज भट्टले केन्द्रको निर्देशन कार्यान्वयन हुनुपर्ने भन्दै आफूले आगामी दिनमा सबैलाई समेटेर लैजाने प्रतिबद्धता गरेका थिए । प्रदेशसभाको एक वर्ष भट्ट नै दलको नेता थिए । पहिलो पटक सरकारमा जाँदा आफै गएको, सबै सांसदहरूसँग छलफल नगरेको, प्रतिपक्ष हुँदा पनि कमजोर भएको लगायतका आरोप उनीमाथि लाग्दै आइरहेको थियो । आइतबार विगतका आफ्नो केही कमजोरी स्वीकार गर्दै आगामी दिनमा पार्टी र संसद् दुवैलाई बलियो बनाउने गरी अगाडि बढ्ने बताए ।

करिब एक वर्षपछि एकताको सन्देश दिनेगरी भएको अनौपचारिक छलफलमा माओवादीभित्रको विवाद मिलाउने, संसद्मा प्रमुख प्रतिपक्षको भूमिका बलियो बनाउने र केन्द्रको सर्कुलर कार्यान्वयन गर्ने विषयमा करिब सहमति जुटेको छ । तर, धामी पक्षले आफ्नो बटमलाइन बनाएको इन्चार्ज फेर्ने विषयले भने दलको नेता फेर्ने विषय पनि पेचिलो नै बनेको छ ।

धनगढी, २५ ।  फागुन  स्थानीय तहमा कार्यरत करारका कर्मचारीलाई फाइदा पुग्ने गरी सुदूरपश्चिम प्रदेश सरकारले ऐन बनाउन लागेको भन्दै आन्दोलन गरिरहेका विद्यार्थीले नेपाली कांग्रेसको झन्डा निकालेर फालेपछि विवाद भएको छ।

आज धनगढीमा मुख्यमन्त्री तथा मन्त्रिपरिषद् कार्यालय अगाडि प्रदर्शनको क्रममा आन्दोलनरत केही विद्यार्थीले रोड क्षेत्रमा राखिएको नेपाली कांग्रेसको झन्डा निकालेर फालेका थिए। भोलि धनगढीमा आयोजना हुन लागेको नेपाली कांग्रेसको प्रदेश स्तरीय सम्मेलनको उद्घाटन गर्न आइरहेकाका पूर्व प्रधानमन्त्री एवम् नेपाली कांग्रेसका सभापति शेरबहादुर देउवाको स्वागतका लागि धनगढीको छ लेन सडकदेखि लिएर मुख्य सडक क्षेत्रमा रहेका विद्युत् पोल र मेडियनमा नेपाली कांग्रेसको झन्डा राखिएको छ।

तर, प्रदेश सरकारलाई दबाब दिन आन्दोलनमा उत्रेका विद्यार्थीले मुख्यमन्त्री तथा मन्त्रिपरिषद् कार्यालय आसपासको क्षेत्रबाट कांग्रेसको झन्डा निकालेर फालेपछि कांग्रेस निकटको भातृसंगठनले त्यसको प्रतिवाद गरेको छ। झन्डा निकालेर फालेकोप्रति आक्रोस व्यक्त गर्दै कांग्रेस निकटका युवाले आन्दोलनरत विद्यार्थीलाई हप्काउनुका साथै उनीहरुको साउन्ड सिस्टम फालेका थिए।

आन्दोलनरत पक्षले तरुण दलका युवाले आफूमाथि कुटपिटसमेत गरेको बताएका छन्। राष्ट्रिय स्वतन्त्र पार्टीका सन्तोषराज जोशीले आन्दोलनरत विद्यार्थीमाथि कुटपिट भएको उल्लेख गर्दै विद्यार्थीको आन्दोलन विथोल्ने प्रयास भइरहेको जिकिर गरे । झण्डा हटाउनु विद्यार्थीबाट गल्ती भएको स्वीकार्दै उनले सम्झाउन छोडेर तरुण दलका युवाले आक्रमण गरेको बताए। तरुण दलले भने सम्मेलनका लागि लगाइएको झन्डा ननिकाल्न आग्रहमात्रै गरेको जनाएको छ।

प्रदेश सरकारले प्रदेश सभामा पेस गरेको सुदूरपश्चिम प्रदेश स्थानीय सेवाको गठन, सञ्चालन र सेवाका सर्तका सम्बन्धमा व्यवस्था गर्न बनेको विधेयकमा भएको व्यवस्थाको विरुद्ध विद्यार्थी सङ्गठनले एक सातादेखि धनगढीमा आन्दोलन गरिरहेका छन्। विधेयकमा सुदूरपश्चिम प्रदेश स्थानीय सेवा ९गठन तथा सञ्चालन० ऐन लागु हुनुभन्दा पहिले स्वीकृत स्थायी दरबन्दीमा अस्थायी वा करार नियुक्तलाई ऐन लागु भएपछि पहिलो पटकका लागि लोकसेवा आयोगले उनीहरूबिचमात्रै आन्तरिक प्रतियोगिताात्मक परीक्षाद्वारा पद्पूर्ति गर्ने उल्लेख गरिएको छ। स्थानीय तहमा ठुलो सङ्ख्यामा रहेका करारका कर्मचारीलाईमात्रै फाइदा पुग्ने गरी सरकारले ऐन बनाउन लागेको जिकिर गर्दै विद्यार्थीले आन्दोलन गरिरहेका छन्।

काठमाडौं । नेकपा माओवादी केन्द्रले ‘जनतासँग माओवादीः तराई–मधेस जागरण अभियान’ केही समय स्थगित गर्ने निर्णय गरेको छ । फागुन महिनाभरका लागि अभियान कार्यक्रम स्थगित गर्ने निर्णय भएको एक नेताले बताए ।

राजावादी गतिविधि बढिरहेको अवस्थामा उनीहरूको गतिविधिलाई चुनौती दिने गरी संसदीय र अन्य मोर्चामा पार्टीलाई सक्रिय राख्न हाललाई अभियान स्थगित गर्ने निर्णय भएको ती नेताको भनाइ छ । अभियान अन्तरगत शनिबार रौतहटमा कार्यक्रम भएको छ । जहाँ अध्यक्ष प्रचण्डसहितका नेताहरू रहेका छन् ।

तर, यसपछिका अभियानलाई भने केही समय स्थगित गरेर संसदीय मोर्चामा सक्रिय रहँदै प्रतिगामी शक्तिहरूको गतिविधिलाई चिर्ने गरी पार्टी लाग्ने माओवादीको भनाइ छ ।

यसअघि पूर्वनिर्धारित कार्यक्रम अनुसार बारामा फागुन २५, पर्सामा फागुन २६, चितवनमा फागुन २७ गते अभियान सञ्चालन हुने तय भएको थियो । यस्तै नवलपुर ९नवलपरासी पूर्व० मा चैत्र २, परासी ९नवलपरासी पश्चिम०मा चैत्र ३, रुपन्देहीमा चैत्र ४, कपिलवस्तुमा चैत्र ५, दाङमा चैत्र ६, बाँकेमा चैत्र ७ र बर्दियामा चैत्र ८ गते अभियान सञ्चालन हुने तय भएको थियो ।

यस्तै कैलालीमा चैत्र ११ गते र कञ्चनपुरमा चैत्र १२ अभियान सञ्चालन भएर सकिने तय भएको थियो । यी सबै कार्यक्रम अब कहिलेदेखि सुरु गरेर कहिले सक्ने भन्नेबारे केन्द्रीय कार्यालयले छिट्टै मिति तय गर्ने ती नेताको भनाइ छ ।

अभियान भने माओवादीले फागुन १२ गते झापाबाट सुरु गरेको थियो । अभियानको स्वरूप जनसभा, चोकसभा, अन्तर्क्रिया, जनभेटघाट आदि रहेका छन् ।

पछिल्लो समय राजावादीहरूले आफ्नो गतिविधि बढाउँदै लगेका छन् । आइतबारका लागि राजावादीहरूले पोखराबाट काठमाडौँ फर्किँदा पूर्वराजा ज्ञानेन्द्र शाहलाई भव्य स्वागत गर्ने तयारी गरेका छन् ।