नेपाललाई मानवअधिकार परिषद्को सदस्य बनाउन परराष्ट्रमन्त्री राणाको आग्रह

काठमाडौँ – परराष्ट्रमन्त्री आरजु राणा देउवाले संयुक्त राष्ट्रसंघीय मानवअधिकार परिषद्को सदस्यताका लागि नेपाललाई मतदान गर्न आग्रह गरेकी छिन्।

जेनेभामा जारी परिषद्को ५८औँ उच्चस्तरीय सत्रलाई सम्बोधन गर्दै उनले नेपालले मानवअधिकार प्रवर्द्धनमा गरेको योगदानका आधारमा समर्थन गर्न अनुरोध गरिन्।

जेनेभास्थित नेपाली स्थायी नियोगद्वारा आयोजित स्वागत समारोहमा उनले नेपाल सरकार शान्ति, प्रजातन्त्र र मानवअधिकार प्रवर्द्धनप्रति प्रतिबद्ध रहेको उल्लेख गरिन्। उनले शान्ति प्रक्रिया, संक्रमणकालीन न्याय, समावेशीता र राष्ट्रिय मानवअधिकार आयोगको स्वतन्त्रतालाई प्राथमिकता दिने बताइन्।

परिषद्को सत्रमा विभिन्न देशका प्रतिनिधिहरू सहभागी थिए। मन्त्री देउवा नेतृत्वको नेपाली प्रतिनिधिमण्डल शनिबार जेनेभा पुगेको थियो र उनको शुक्रबार स्वदेश फर्कने कार्यक्रम छ।