धनगढी – दिपायल र सहजपुर–बोक्टान सडकका विषयमा प्रधानमन्त्रीलाई प्रेम आलेको प्रश्न

काठमाडौँ । सांसद प्रेम आलेले सोधेको २ वटा प्रश्नमा प्रधानमन्त्री केपी शर्मा ओलीले जवाफ दिएका छन् । उनले विकास निर्माणको विषयमा केन्द्रीत रहेर प्रधानमन्त्रीलाई प्रश्न सोधेका थिए ।
जवाफका क्रममा प्रधानमन्त्री ओलीले भने, ‘धनगढी देखि दिपायल हुदै उरै भञ्ज्याङ्गसम्म निर्माण हुने सडकले यात्रा अवधि उल्लेखनीय मात्रामा घट्न जाने हुनाले यसको निर्माण र स्तरोन्नति सरकारको प्राथमिकतामा रहेको छ। सरकारले हालै स्रोत सुनिश्चितता प्रदान गरेकोले आयोजनाको केही दिनमा नै ठेक्का प्रक्रिया शुरु हुनेछ।’

यस्तै आलेको दोस्रो प्रश्नमा ओलीले सहजपुर–बोक्तान–दिपायल सडकका सम्बन्धमा नेपाल सरकार र भारतको बीच सम्पन्न सम्झौताअनुसार करिब ५० किलोमिटर निर्माण कार्य सम्पन्न भइसकेको बताए ।
उनले भने, ‘उक्त सडकको बाँकी खण्डको निर्माणका लागि भारत सरकारसँग कुटनीतिक पहल गरिएकोमा उक्त खण्डलाई एलओसी–३ मा समावेश भएको जानकारी प्राप्त भएको छ।  यस आयोजनाको निर्माण कार्यलाई सरकारले उच्च प्राथमिकतामा राखेको छ।’