खाने तेल र घिउको मूल्य बढ्यो

द एभरेष्ट पोष्ट
२९ माघ २०८१ १३:३०
खाने तेल र घिउको मूल्य बढ्यो

काठमाडौं, २९ माघ । पछिल्लो समय बजारमा खाने तेल र घिउको मूल्यमा वृद्धि भएको छ । अहिले तेल तथा घिउको मूल्य प्रतिलिटर ४० देखि ६० रुपैयाँसम्म वृद्धि भएको  हो  । बजारमा तेल र घिउको मूल्यमा भएको अस्वाभाविक वृद्धिले सरकारी निगरानी र नियन्त्रणको अभावलाई उजागर गरिरहेको छ।

दशैँ–तिहारजस्ता महान चाडपर्वमा समेत मूल्य नबढेको तेल–घिउको मूल्य पछिल्लो केही महिनामा ह्वात्तै वृद्धि भएको छ । अहिले सूर्यमुखी र भटमास तेलको मूल्य प्रतिलिटर २५० देखि २७० रुपैयाँसम्म पुगेका छ । यसअघि उक्त तेलको मूल्य २१० देखि २२० रुपैयाँ प्रतिलिटरसम्म थियो । तोरीको तेलको मूल्य पनि अत्यधिक बढेर ३२५ रुपैयाँभन्दा बढी भएको छ ।

यस्तो छ एक महिनाको मूल्य वृद्धिको अवस्था

खुद्रा व्यापार संघको तथ्यांकअनुसार तेल तथा घिउको मूल्यमा १५ दिनमै ५ देखि १० रुपैयाँले वृृद्धि भएको हो । गत माघ १ गते प्रतिलिटर ४०० रुपैयाँ पर्ने भुटेको तोरीको तेल प्रतिलिटर १० रुपैयाँले बढेर ४१० रुपैयाँ कायम भएको छ । सोही अवधिमा सूर्यमुखी र भटमासको तेलमा ५–५ रुपैयाँका दरले मूल्यवृद्धि भएको छ । खुद्रा व्यापार संघका अनुसार दशैँ र तिहारजस्ता चाडपर्वको समयमा तेल र घिउको मूल्य स्थिर थियो, तर पछिल्लो दुई महिनामा बजारमा घिउ र तेलको मूल्यमा अप्रत्याशित वृद्धि भएको छ ।

सामान्यतया, तोरीको तेल, सूर्यमुखी तेल र भटमास तेलको मूल्यमा क्रमशः ५ देखि १० रुपैयाँको वृद्धि भएको छ । यसबाहेक, सरकारी व्यापार कम्पनीमा पनि तेल र घिउको मूल्य उच्च स्तरमा रहेको छ । सरकारी व्यापार कम्पनी साल्ट ट्रेडिङ र खाद्य व्यवस्था तथा व्यापार कम्पनीमा भटमास तेल २५० देखि २६० रुपैयाँ, सूर्यमुखी तेल २८० देखि ४०० रुपैयाँ र तोरीको तेल २६० देखि ४२५ रुपैयाँमा बिक्री भइरहेको छ ।

विगत केही महिनामा तेलको मूल्यमा बारम्बार वृद्धि भइरहेको छ, जसका कारण उपभोक्ताहरूको बजेटमा दबाव परेको छ । भारतमा निर्यातको वृद्धि र आपूर्ति शृङ्खलामा भएको परिवर्तनका कारण तेलको मूल्यमा वृद्ध‍ि भएको नेपाल तेल उत्पादक संघले जनाएको छ ।

यसको बावजुद, सरकारको तर्फबाट भने यस विषयमा हालसम्म कुनै स्पष्ट कदम उठाइएको छैन । उपभोक्ताहरुले भने तेल र घिउको मूल्यमा आएको अस्वाभाविक वृद्धि प्रति सरकारबाट तत्काल प्रतिक्रिया र नियमनको अपेक्षा गरेका छन् ।

 

Leave a Reply

Your email address will not be published. Required fields are marked *

सम्बन्धित

खोज्नुहोस