टीकापुर सरोकार समुहले वीरेन्द्र विद्या मन्दिर टीकापुरमा सुविधा सम्पन्न पुस्तकालय बनाउने

टीकापुर, (कैलाली),१३ माघ ।
विगत केही वर्षयता टीकापुर र त्यस आसपासका क्षेत्रमा सामाजिक एवम मानवीय कार्यसंगै विभिन्न परियोजना सञ्चालन गर्दै आएको टीकापुर सरोकार समूहले  वीरेन्द्र विद्या मन्दिर माध्यमिक विद्यालयको स्वर्ण जयन्तीको अवसरमा अत्याधुनिक सुविधा सम्पन्न  पुस्तकालय,  इलेक्ट्रोनिक लाइब्रेरी(ई-लाईव्रेरी)  स्थापना गर्ने भएको छ  ।

सरोकारवाला र वीज्ञहरुले विद्यालयको शैक्षिक सुधारका लागि सुविधा सम्पन्न पुस्तकालयको आवश्यकता औल्याएपछि टीकापुर सरोकार समूहले पुस्तकालय स्थापना गर्न लागिएको जनाएको छ । समूहले जारी गरेको विज्ञप्तिमा पुस्तकालयको आधुनिकीकरणबाट हुने पठन संस्कृतिको विकासले विद्यार्थीहरुको ज्ञानको दायरा फराकिलो गर्नुका साथै उनीहरुलाई बाह्य संसारसंग जोड्ने विश्वास गरेको छ । सोही सोचले वीरेन्द्र विद्या मन्दिरमा अत्याधुनिक पुस्तकालय निर्माण गर्न लागिएको र त्यसका लागि आवश्यक सहयोग जुटाईसकेको टीकापुर सरोकार समूहले जनाएको छ ।

टीकापुर सरोकार समूहका संरक्षक हिक्मत थापाको अगुवाईमा वीरेन्द्र विद्या मन्दिरमा पुस्तकालय स्थापना हुन लागेको हो । पुस्तकालयमा पाठ्यक्रमका सहित  सयौं महत्त्वपूर्ण  पुस्तकहरु , १० हजार भन्दा बढि ई पुस्तकहरु,  कम्प्युटरहरु, त्यसका सहायक सफ्टवेयर र अन्य उपकरणहरु, बस्ने आरामदायी कुर्सी एवं पढ्ने टेबुलहरु लगायतका सुविधाहरू स्थापित रजडान गरिने बताईएको छ ।

विभिन्न संघसंस्था र व्यक्तिहरुको सहयोगमा सरोकार समूहको संयोजनमा स्थापना गर्न लागिएको पुस्तकालयका लागि नेपाल लाइब्रेरी फाउन्डेसनको प्राविधिकले गर्नेछ, समूहका सचिव नवराज भट्टराईले बिज्ञप्तीमा भनेका छन्, पुस्तकालय  निर्माणको ऎतिहासिक कार्यमा  सहयोग गर्ने सम्पूर्ण दाता र संघसंस्थाहरु प्रति हामी अत्यन्त अनुग्रहित छौ ।

पुस्तकालय स्थापनाका लागि डा. सुधीर रुपारेलिया, रुपारेलिया फाउन्डेसन युगान्डा, अफ्रिकाले  अमेरिकी डलर ५००० ( छ लाख ८० हजार रुपैया), मीनबहादुर रावलले चार लाख र गगन फाउन्डेसन टीकापुरले एक लाख  रुपैया प्रथम चरणमा सहयोग गरेको छ ।

पुस्तकालयको परिकल्पनालाई साकार बनाउन अहोरात्र खटिने वीरेन्द्र विद्या मन्दिरका गुठियार, प्राचार्य, शिक्षक, युगान्डाका लागि नेपाल सरकारका मानार्थ महावाणिज्यदूत  डा.सुधीर रुपारेलिया, टीकापुर विकास समितिका पूर्व अध्यक्ष मीन बहादुर रावल, यस योजनाका परिकल्पनाकार र समन्वयकर्ता  टीकापुर सरोकार समूहका संरक्षक हिक्मत थापा, अध्यक्ष प्रशान्त अर्याल, सदस्य विकास रावल लगायत समूहका सदस्य, शुभचिन्तक र दाताहरु प्रति समूहले आभार व्यक्त गरेको छ ।
पुस्तकालय स्थापनाका लागि सर्वाधिक सहयोग गर्ने डा.सुधीर रुपारेलिया युगान्डाका लागि नेपालका अवैतिनिक वाणिज्य दूत हुन् । उनी युगाण्डाको सबैभन्दा ठूलो औद्योगिक एवम व्यापारिक प्रतिष्ठान  रुपारेलिया ग्रुपका अध्यक्ष समेत हुन् ।

अर्का दाता रावल टीकापुर नगर तथा वीरेन्द्र विद्या मन्दिरको स्थापनामा योगदान दिने प्रमुख व्यक्तिमध्ये एक हुन् टीकापुर विकास समितिका पूर्व योजना अध्यक्ष रावल विद्वान, सामाजिक चिन्तक तथा कुशल योजनावीद तथा ब्यबस्थापकका रुपमा चिनिन्छन् ।

त्यस्तै अर्को सहयोगी संस्था गगन फाउन्डेसन स्वर्गीय साहित्यकार तथा समाजसेवी गगनसिंह थापाको स्मृतिमा स्थापित सामाजिक संस्था हो । थापाका कर्णालीको छेउछाउ, पुर्खाको चिठ्टी, अस्ताचलको ढोकाबाट  लगायत नौ वटा साहित्यिक कृतिहरु प्रकाशित छन् ।