कञ्चनपुर पुगेर सकियो माओवादीको तराई-मधेश जागरण अभियान

काठमाठौं । नेकपा माओवादी केन्द्रले झापाबाट सुरु गरेको ‘जनतासँग माओवादीः तराई-मधेश जागरण अभियान’ कञ्चनपुर पुगेर समापन भएको छ । हुलाकी राजमार्ग केन्द्रित अभियान माओवादी केन्द्रले गत वर्षको १२ फागुनमा झापाको कचनकवल गाउँपालिकाको बनियानीबाट सुरु गरेको थियो ।

बीचमा रोकिँदै फेरि सुरु हुँदै गरेको यो अभियान दुई महिनापछि बुधबार कञ्चनपुरको भीमदत्तनगर पुगेर समापन भएको हो । अभियान समापन कार्यक्रममा बोल्दै माओवादी अध्यक्ष पुष्पकमल दाहाल प्रचण्डले अभियानका क्रममा जनताका मुद्दा, अधिकार र विकासका मुद्दा उठान गरिएको बताए ।

उनले अभियानका क्रममा शहीद र बेपत्ताका परिवारलाई भेटेर उनीहरूको अवस्था नजिकबाट बुझ्ने काम भएको पनि बताए । अभियानबाट अपेक्षा गरिएको भन्दा बढी उपलब्धि हासिल गरिएको प्रचण्डको दाबी थियो ।

‘तराई-मधेश जागरण अभियान माओवादी केन्द्रको मात्रै नभएर सबैको साझा अभियानका रूपमा सफल भएको छ,’ उनले भने, ‘अब तराई र मधेशका विकासबारे साझा एजेण्डा बनाउने छौँ ।’