मुक्त कमैया, हलिया र कमलरीको पुनस्र्थापनाका कटअफ डेट आवश्यक-पाठक
धनगढी, १६बैशाख ।
सुदूरपश्चिम प्रदेशसभा अन्तर्गत रहेको सामाजिक बिकास समितिका सभापतिका सभापति धर्मराज पाठकले मुक्त कमैया, हलिया र कमलरीको पुनस्र्थापनाका लागि कटअफ डेट तयार गर्न सुदूरपश्चिम प्रदेश सरकारलाई आग्रह गरेका छन् ।
मुक्त कमैया समाज, राष्ट्रिय दलित नेटवर्क, नेपाल, राष्ट्रिय मुक्त हलिया महासंघ नेपाल र मुक्त कमलरी बिकास मञ्चका प्रतिनिधिहरुको सहभागितामा सम्पन्न डेलीगेशन तथा भेटघाटका क्रममा सभापति पाठकले सरकारले २०५७ मा कमैया, २०६५ मा हलिया र २०७० मा कमलरी मुक्तिको घोषणा गरेपनि हालसम्म पुनस्र्थापनाको कार्य सम्पन्न हुन नसकेकोमा दुःख व्यक्त गर्दै उक्त समस्या समाधानका लागि प्रदेश सरकारलाई कटअफ डेट तयार गर्न आग्रह गर्ने बताए ।
प्रतिनिधि मण्डलले सामाजिक समितिका सभापति पाठकलाई मुक्त कमैया, कमलरी र हलियाको पुनस्र्थापनाका सवालमा बिभिन्न मागहरु राखी ध्यानार्कषण पत्र बुझाएका थिए ।
सोही क्रममा द फ्रिडम फण्डका जनवकालत सल्लाहकार एवं अधिवक्ता बालाराम भट्टराईले नेपालको संविधानले सुनिश्चित गरेका मौलिक हकहरूको प्रभावकारी कार्यान्वयन गर्नु, राजनीतिक परिवर्तनको अनुभूति गराउनु, समाजमा सम्मानित जीवन जिउन पाउने वातावरणको सुनिश्चितता गर्नु सरकारको संवैधानिक दायित्व रहेको स्मरण गराए ।
अधिवक्ता भट्टराईले सरकारले विभिन्न समयमा मुक्त हलिया, कमैया तथा कम्लहरी आन्दोलनसंग गरेका प्रतिवद्धता र सहमतिहरूको छिटोछरितो र प्रभावकारी कार्यान्वयनको दायित्व पूरा गर्न नसकेको दुःख व्यक्त गरे ।
मुक्त कमैया समाजका केन्द्रीय अध्यक्ष पशुपती चौधरीले संघिय सरकार भूमिब्यवस्था मन्त्रालयले गठन गरेको मुक्त कमैया, कम्लहरी, हलिया तथा हरवाचरवाको वस्तुस्थिति अध्ययन समितिले गरेका सिफारिसहरूलाई सुदूरपश्चिम प्रदेश सरकारले आगामि नीति तथा कार्यक्रम र बजेटमार्फत योजनाबद्ध कार्यान्वयनमा पहल गर्न माग गरे ।
मुक्त कमलरी बिकास मञ्चका केन्द्रीय अध्यक्ष हिरामोती चौधरीले मु्क्त कम्लहरीको लगत संकलन पुरा गरी लगत लिएका सबै मुक्त कम्लहरीलाई प्रमाणिकरण गर्दै परिचय पत्र उपलब्ध गराउनका साथै परिचय पत्र पाएका सबै कम्लहरीलाई दीर्घकालीन प्रकृतिको जीवनोपयोगी सीप तालिम र उच्च तहसम्मको निशुल्क प्राविधिक÷व्यवसायीक शिक्षाको प्रबन्ध गर्न आग्रह गरिन।
ट्रेन्डिङ
ताजा समाचार
सम्बन्धित
