दिल्लीको १९ वर्षमुनिको टोलीसँग नेपालको क्लीन स्वीप

काठमाण्डौ – दिल्लीको १९ वर्षमुनिको टोलीसँगको तीन खेलको एकदिवसीय क्रिकेटको अभ्यास शृङ्खला नेपाली युवा टोलीले क्लीन स्वीप गरेको छ । वीरगञ्जमा भएको तेस्रो खेलमा दिल्लीलाई ५१ रनले पराजित गर्दै नेपालले शृङ्खला क्लीन स्वीप गरेको हो ।

यसअघि लगातार दुई खेल जितेर नेपालले शृङ्खला जितिसकेको थियो । आज नेपालले दिएको एक सय २३ रनको लक्ष्य पछ्याएको दिल्ली १७ ओभरमा ७१ रन बनाउँदा अल आउट भयो । त्यसअघि ब्याटिङ गरेको नेपाल ३९ ओभर चार बलमा एक सय २२ रन बनाएर अल आउट भयो ।

विश्वकप छनोटको तयारीका लागि दिल्लीसँग तीन खेलको शृङ्खला खेलेपछि नेपालले अफगानिस्तानसँग पनि तीन खेलको शृङ्खला खेल्ने तय छ । अफगानिस्तानसँगको शृङ्खला चैत २१ देखि मुलपानीमा हुनेछ । नेपालले चैत अन्तिम हप्तादेखि आइसिसी १९ वर्षमुनिको विश्वकपअन्तर्गत एशिया छनोट आयोजना गर्दैछ ।