युक्रेन युद्धबारे ट्रम्प र पुटिनबीच वार्ता हुँदै

एजेन्सी । रूसी राष्ट्रपति भ्लादिमिर पुटिन र अमेरिकी राष्ट्रपति डोनाल्ड ट्रम्पले मंगलबार वार्ता गर्ने भएका छन् । उनीहरुबीच नेपाली समयअनुसार साँझ पौने ७ बजे वार्ता हुने भएको हो ।

जसमा युक्रेन र अमेरिका-रूस सम्बन्ध मुख्य एजेन्डा हुनेछन् । क्रेमलिनका प्रवक्ता दिमित्री पेस्कोभले फेब्रुअरी १२ मा भएको फोन वार्ता र वासिङ्टन-मस्कोबीच भएका उच्चस्तरीय छलफलपछि दुवै नेताहरूबीच ‘केही समझदारी’ बनेको बताएका छन् ।

‘तर हाम्रो दुईपक्षीय सम्बन्ध सामान्यीकरणका साथै युक्रेन मामिलाको समाधान सम्बन्धी धेरै प्रश्नहरू छन्। यी सबै विषय दुई राष्ट्रपतिबीच छलफल हुनुपर्नेछ,’ पेस्कोभले पत्रकारहरूलाई भने ।

उनका अनुसार वार्ताको कुनै समयसीमा तोकिएको छैन । पुटिन र ट्रम्पले आवश्यक ठानेसम्म कुरा गर्नेछन् ।