ह्वाट्सएप ग्रुपबाट निकालेको भन्दै एडमिनको गोली हानी हत्या

एजेन्सी : पाकिस्तानको खैबर पख्तुनख्वा राज्यको राजधानी पेशावरमा, व्हाट्सएप ग्रुपबाट हटाइएको निहुँमा एक व्यक्तिले ग्रुप एडमिनको गोली हानी हत्या गरेका छन्।

यो घटना शनिबार पेशावरको बाहिरी इलाकामा रहेको रेगीमा भएको प्रहरीले जनाएको छ। अहिलेसम्म अभियुक्तलाई प्रहरीले पक्राउ गर्न सकेको छैन।

प्रहरीका अनुसार मुश्ताक अहमद नामक एक व्हाट्सएप एडमिनले अशफाक खानलाई ग्रुपबाट हटाएका थिए। यसपछि दुई जनाबीच विवाद भएको थियो।

बिहीबार, दुवै जना विवाद अन्त्य गर्न सहमत भएका थिए तर भेट हुने बित्तिकै अशफाकले मुश्ताकलाई गोली हानी हत्या गरे। अशफाकलाई ग्रुपबाट किन हटाइयो भन्ने कुरा अझै थाहा भएको छैन।

मृतकका भाइ हुमायुन खानले मिडियालाई भने- ‘मेरो भाइ र अशफाक बीच एउटा व्हाट्सएप ग्रुपमा केही विवाद भएको थियो, जसका कारण उसले अशफाकलाई ग्रुपबाट हटायो। यसपछि अशफाक रिसाएर मेरो भाइलाई गोली हान्यो। हाम्रो परिवारमा कसैलाई पनि दुई जना बीचको झगडाको बारेमा केही थाहा थिएन।’

प्रहरीले अशफाक विरुद्ध उजुरी दर्ता गरेको छ। अभियुक्तहरूलाई पक्राउ गर्न छापा मार्ने काम जारी छ।

पाकिस्तान र अफगानिस्तानको सीमामा अवस्थित खैबर पख्तुनख्वालाई पाकिस्तानको अत्यन्तै संवेदनशील क्षेत्र मानिन्छ। यो क्षेत्र पाकिस्तानमा मात्र नभई विश्वमै सबैभन्दा बढी हिंसा प्रभावित क्षेत्रहरू मध्ये एक हो।