प्रयागराज महाकुम्भमा ६६ करोड श्रद्धालु सहभागी

काठमाडौं। भारतको उत्तर प्रदेश, प्रयागराजमा ४५ दिनसम्म चलेको महाकुम्भ मेला समापन भएको छ। पुस २९ गते शुरू भएको मेला हिजो महाशिवरात्रिको दिन समापन भएको हो। मेला औपचारिक रुपमा समापन भए पनि श्रद्धालुहरु पुग्ने क्रम जारी छ।

यो अवधिमा ६६ करोड जनाभन्दा धेरै मानिसले गङ्गामा स्नान गरेका भारतीय सञ्चारमाध्यमहरूले जनाएका छन्। महाकुम्भको अन्तिम दिन हिजो मात्रै डेढ करोड जनाभन्दा धेरैले स्नान गरेका थिए। उत्तर प्रदेश सरकारले मेलामा ४० करोड जना मानिस सहभागी हुने अनुमान गरेको थियो।

कुम्भमेलालाई विश्वकै सबैभन्दा धेरै मानिस जमघट हुने पर्व मानिन्छ। संयुक्त राष्ट्रसङ्घले यो मेलालाई मानव जातिको ‘अमूर्त सम्पदा’ का रूपमा उल्लेख गरेको छ।

कुम्भमेला भारतका चार वटा शहरमा हरेक १२ वर्षमा मनाइन्छ। दुई कुम्भमेलाको बीचको अवधिमा अर्धकुम्भमेला पनि आयोजना हुने गरेको छ। प्रयागराजमा आयोजित हुनेलाई सबैभन्दा ठूलो महाकुम्भ मानिन्छ।