राष्ट्रिय सभालाई वृद्धाश्रम भनेपछि…

काठमाडौँ । राष्ट्रिय प्रजातन्त्र पार्टी (राप्रपा ) का प्रमुख सचेतक ज्ञानेन्द्र शाहीले राष्ट्रिय सभालाई वृद्धाश्रम भनेपछि नेकपा एमाले र माओवादी केन्द्रका सांसदले आपत्ति जनाएका छन्।

मंगलबार प्रतिनिधि सभामा आम सञ्चार विधेयकमाथिको छलफलका क्रममा सांसद शाहीले राष्ट्रिय सभाबाट पारित विधेयक अध्ययन नै नगरी आएको आरोप लगाए।

उनले वैदेशिक लगानी सम्बन्धी ऐनले आम सञ्चार क्षेत्रमा वैदेशिक लगानी निषेध गरेको भए पनि विधेयकमा त्यसलाई खुला गरिएको भन्दै प्रश्न उठाए। ूयत्तिसम्म पनि अध्ययन गरेर नआउने हो भने राष्ट्रिय सभालाई वृद्धाश्रम नभनेर के भन्ने ? भन्दै उनले टिप्पणी गरे।

शाहीको यो भनाइप्रति माओवादी केन्द्रका प्रमुख सचेतक हितराज पाण्डे र एमाले सांसद रघुजी पन्तले आपत्ति जनाए।

राष्ट्रिय सभाबारे गरिएको टिप्पणी अनुचित भएको बताउँदै पाण्डेले सभामुख देवराज घिमिरेको ध्यानाकर्षण गराए। एमाले सांसद पन्तले पनि शाहीको अभिव्यक्तिलाई अस्वीकार्य भन्दै विरोध जनाए।