थारु जातीको मुद्दामा नेपाली काँग्रेस संवेदनशील छ- परराष्ट्रमन्त्री डा. राणा

धनगढी, २७ माघ ।
नेपाली कांग्रेसकी केन्द्रीय सदस्य तथा परराष्ट्रमन्त्री डा. आरजु राणा देउवाले थारु जातीको हक, हीत र अधिकारका लागि नेपाली काँग्रेसले काम गर्दै आएको बताएकी छिन् ।

नेपाली कांग्रेस थारू विभाग र नेपाल थारू सङ्घ कैलालीको संयुक्त आयोजनामा शनिबार कैलालीको कैलारी गाउँपालिकामा शनिवार शुरु भएको प्रथम कैलाली जिल्ला भेलामा बोल्दै परराष्ट्रमन्त्री डा. राणाले नेपाली कांग्रेसका सभापति तथा पूर्व प्रधानमन्त्री शेरबहादुर देउवाकै नेतृत्वमा ०५७ सालमा कमैया प्रथा उन्मुलन भएको स्मरण गरिन् ।

नेपाल बहुसांस्कृतिक देश हो, यहाँ विभिन्न जातजातिको बसोबास छ, परराष्ट्रमन्त्री डा. राणाले भने, हामीले सबैको संस्कृतिलाई संरक्षण र सम्मान गर्नुपर्छ । काँग्रेस त्यसमा संवेदनशील छ ।

थारु महिलाको पहिरनमा कार्यक्रममा सहभागी भएकी परराष्ट्रमन्त्री डा. राणाले विदेशमा जादा थारु पहिरनमा कार्यक्रममा सहभागी हुने बताईन् । मन्त्री राणाले भनिन्,देशकै प्रतिनिधित्व गर्ने भएकोले विदेशका कार्यक्रममा सबै जातजातीको पोशाक लगाउने प्रयास गर्नेछु ।

थारू जाती संस्कारी र इमानदार भएको चर्चा गर्दै मन्त्री देउवाले थारू जातिको हक र अधिकारमा नेपाली कांग्रेस सधै तत्पर रहेको दोहोर्‍याईन ।

उनले थारू समुदायमा ठुलो समस्याका रूपमा रहेको सिकलसेल एनिमिया रोग निवारणमा समेत नेपाल सरकारले पहल गरिरहेको जानकारी दिईन ।