एचपीभी खोप अभियानका लागि आवश्यक खोप नेपाल आइपुग्यो

काठमाडौ‌ं – पाठेघरको क्यान्सरविरुद्धको ‘एचपीभी’ खोप अभियानका लागि आवश्यक करिब १७ लाख ७० हजार ४ सय मात्रा खोप नेपाल आइपुगेको छ।

आइतबार राती  ७:४५ मा २ लाख ६६ हजार ६३० मात्रा खोप क्याथे प्यासेफिकको उडानबाट काठमाडौ आईपुगेसँगै अभियानका लागि आवश्यक सबै मात्रा खोप नेपाल आइपुगेको स्वास्थ्य सेवा विभाग व्यवस्थापन महाशाखा अन्तर्गत आपूर्ति शाखाका भ्याक्सिन तथा कोल्डचेन इकाई प्रमुख सञ्जीव कट्टेलले  जानकारी दिए। यस वर्षको एचपीभी खोप अभियानका लागि यो अन्तिम चरणको खोप हो।

करिब ३ लाख ८० हजार मात्रा खोप मधेस प्रदेशमा पठाउने तयारी गरिएको छ। अन्य प्रदेशका लागि आवश्यक खोप वितरण तालिका अनुसार पठाइसकिएको उनले बताए।  ‘आगामी दुई तीन दिनभित्र प्रदेश स्वास्थ्य आपूर्ति केन्द्रका खोप पुग्नेछ’, उनले भने, ‘प्रत्येक जिल्लामा प्रदेश स्वास्थ्य आपूर्ति केन्द्रले आवश्यक खोप वितरण गर्नेछन्।’

विभिन्न चार चरणमा गरी अभियानका लागि आवश्यक करिब १७ लाख ७० हजार ४ सय मात्रा खोप नेपाल आइपुगेको हो।पाठेघरको मुखको क्यान्सरका कारण बढ्दै गएको अकाल मृत्युको जोखिमबाट जोगाउने उद्देश्यका साथ करिब १७ लाख किशोरीलाई खोप दिन लागिएको हो। यही माघ २२ गतेदेखि एचपीभी खोप अभियानमार्फत कक्षा ६ देखि १० मा अध्ययनरत किशोरी तथा विद्यालय बाहिर रहेका १०–१४ वर्षकी किशोरीलाई खोप लगाइने छ।नेपालमा पाठेघरको क्यान्सरलाई निवारण गर्ने लक्ष्यका साथ सरकारले एचपीभी खोप अभियान २०८१, ८२ सञ्चालन गर्ने निर्णय गरिसकेको छ।

सरकारले १० देखी १४ वर्षसम्मका किशोरीहरुलाई दिन लागेको सिकोलिन नामक उक्त खोपले नेपालमा बढी मात्रामा देखिएको पाठेघरको मुखको क्यान्सरका १६ देखी १८ प्रजातीलाई रोकथाम गर्न सक्ने टेकुस्थित बाल स्वास्थ्य तथा खोप सेवा शाखा प्रमुख डा अभियान गौतम बतााउँछन्।  विश्वमा हरेक वर्ष ५ लाख ७० लाख महिलाहरुलाई पाठेघरको क्यान्सर हुने तथा उक्त संख्या सन् २०३० सम्ममा उक्त संख्या ७ लाख पुग्ने अनुमान गरिएको छ। तथ्यांक अनुसार तीमध्ये  ३ लाख ११ हजार महिलाको मृत्यु हुने गरेको छ।