Month: December 2024

काठमाडौँ — नेपाल प्रिमियर लिग (एनपीएल) क्रिकेटको फाइनलमा सुदूरपश्चिम रोयल्सले जनकपुर बोल्ट्सविरुद्ध पहिला ब्याटिङ गर्ने भएको छ । त्रिवि क्रिकेट मैदान कीर्तिपुरमा शनिबार सुदूरपश्चिमका कप्तान दीपेन्द्रसिंह ऐरीले टस जितेपछि पहिला ब्याटिङ रोजेका हुन् ।

दुवै टोलीले पछिल्लो खेल खेलेको टोलीबाट कुनै खेलाडी परिवर्तन गरेका छैनन् । सुदूरपश्चिमले जनकपुरलाई क्वालिफायर १ मा र जनकपुरले कर्णाली याक्सलाई क्वालिफायर २ मा पराजित गरी फाइनलमा पुगेका थिए ।

सुदूरपश्चिमले यसै प्रतियोगितामा जनकपुरलाई दुई पटक पराजित गरी फाइनलमा पुगेको थियो । राउन्ड रोबिन लिग खेलमा सुदूरपश्चिमले जनकपुरमाथि ७२ रनको विजय हात पारेको थियो । सुदूरपश्चिमलाई १२३–९ को स्कोरमा रोके पनि जवाफमा आएको जनकपुर १२.१ ओभरमा ५१ रनमै अलआउट भएको थियो । यो स्कोर एनपीएलकै न्यून स्कोरमा रह्यो ।

जनकपुरलाई क्वालिफायर १ मा ८ विकेटले सहजै पराजित गरी सुदूरपश्चिम फाइनल पुगेको थियो । जनकपुरलाई १३९–९ को स्कोरमा रोकेपछि सुदूरपश्चिमले भेट्रान ओपनर विनोद भण्डारीको अविजित ५८ रनमा ९ बलअगाडि नै १ सय ४१ रन बनाउँदै फाइनल पुगेको थियो ।

जनकपुरले क्वालिफायर २ मा कर्णाली याक्समाथि २ विकेटको विजय हात पारी सुदूरपश्चिमसँगको फाइनल भेट पक्का गरेको थियो । न्युजिल्यान्डका अलराउन्डर जिम्मी निसमले अलराउन्ड प्रदर्शन गर्दै जनकपुरलाई फाइनलमा पुर्‍याएका थिए । उनले २ विकेट लिएपछि पहिला ब्याटिङ गरेको कर्णालीले निर्धारित २० ओभरमा ९ विकेट गुमाई १ सय १८ रन बनाएको थियो । निसमले १७ बलमा ४५ रन बनाएपछि जनकपुरले एक ओभर अगाडि लक्ष्य पूरा गरेको थियो ।

सुदूरपश्चिमले फाइनल पुग्ने क्रममा ८ मध्येको ७ खेल जितेको थियो । जनकपुरले ९ मध्येको ६ खेल जितेको थियो भने ३ मा पराजय भोगेको थियो, त्यसमध्येको दुई पराजय सुदूरपश्चिमसँगै थियो ।

काठमाडौं । एसीसी अन्डर नाइन्टिन महिला एसिया कपमाको सुपर-४ को आफ्नो अन्तिम खेलमा नेपाल बंगलादेशसँग ९ विकेटले पराजित भएको छ ।

नेपालले दिएको ५५ रनको लक्ष्य बंगलादेशले ९.५ ओभरमा १ विकेटको क्षतिमा पूरा गरेको हो ।

वर्षाका कारण खेल ११ ओभरमा छोट्याइएको थियो । टस हारेर पहिले ब्याटिङको निम्तो पाएको नेपाले निर्धारित ११ ओभरमा ७ विकेट गुमाएर ५४ रन बनाएको थियो ।

काठमाण्डौं, ५ पुस ।
‘सुदूरको शान, मैदानमा तुफान’ र ‘बाघ’ नेपाल प्रिमियर लिग (एनपीएल) मा सबैभन्दा बढि सुनिएका शब्दहरु हुन् । सुदूरको शानका रुपमा चर्चा गरिएको टीम सुदूर पश्चिम रोयल्सका बाघको उपमा पाएका खेलाडी हुन्, दिपेन्द्र ऐरी ।

एनपीएलमा प्रतिस्पर्धा गरिरहेका अधिकांश टीममा सुदूरका खेलाडी नभएका होईनन । ती टीमको जितमा सुदूरका खेलाडीहरु निर्णायक भईरहदा कीर्तिपुरको मैदानमा मंसिर १५ देखि जारी एनपिएलमा आफ्ना प्रतिस्पर्धी टिमलाई मैदानमा पानी पिलाउने सुदूर पश्चिम रोयल्सका कप्तान दिपेन्द्र ऐरी नै हुन्, जसको जन्मथलो सुदूरपश्चिम हो ।

हुन् पनि खेल मैदानमा उत्रिएपछि सुदूर पश्चिम रोयल्सले हरेक खेलमा तुफान ल्याएको छ । त्यो तुफानले हुत्याएर कति टीमलाई मैदान बाहिर पु¥याई दिएको छ । जो फेरि मैदानमा उभिईरहने अवस्थामा रहेनन । तुफान ल्याउनुमा दिपेन्द्र ऐरी अर्थात ‘बाघ’ को स्फूर्ती, कौशल र उत्कृष्ट प्रदर्शनको योगदान नकार्न मिल्दैन ।

कतिपय खेलमा हारको सन्निकट भएर अप्रत्याशित जित निकालेर समर्थकलाई अपार खुशी दिएको सुदूर पश्चिमले प्रतिद्धन्द्धी टीमका समर्थकहरुलाई निराश बनाउदै आएको छ । कतिपय खेलमा यति फराकिलो जित हात पारेको छ कि प्रतिद्धन्द्धीको फेरि प्रतिस्पर्धामा आउनै नसक्ने गरी मनोबल खस्काएको छ ।

तीन खेलमा अविजित रहेको सुदूर पश्चिम रोयल्स चौथो खेलमा चितवन राईनोजसंग पराजित भएपछि राईनोजका समर्थकहरुले ‘गैडासंग बाघ’ पराजित भएको भन्न भ्याए । हुन पनि शुरुवातदेखि उत्कृष्ट फर्ममा रहेको सुदूर पश्चिमका लागि चितवनसंगको त्यो हार अप्रत्याशित थियो ।

चौथो खेलमा लय गुमाउदा बेहोरेको हारको पीडाबाट निस्किन सुदूरपश्चिम पाँचौ खेल जित्नै पर्ने दवावमा थियो । उत्कृष्ट लयमा फर्किर्दै पाँचौ खेलमा जित दिलाएर सुदूर पश्चिम रोयल्सले आफ्ना समर्थकहरुलाई भरोसा दिलायो, र भन्यो, एउटा खेलको हारले हामीलाई बिचलित बनाउदैन । पूर्ण मनोबलका साथ मैदानमा उत्रिएको सुदूर पश्चिम रोयल्सले पाँचौ खेलमा समर्थकहरुलाई निराश हुन दिएन ।

सुदूरपश्चिमसंग यसअघि लिग र क्वालिफायरका दुई खेल खेलेको जनकपुरसंग ती दुबै खेलको नमिठो अनुभव छ । उसले दुबै खेलमा सुदूरपश्चिमसंग लज्जास्पद हार व्यहोरेको थियो ।

सुदूर पश्चिम रोयल्ससंग लिग चरणमा ५१ रनमा समेटिएको जनकपुरले बुधबार क्वालिफायरको पहिलो खेलमा १३९ रनको स्कोर खडा गरेको थियो, जसलाई सुदूरले पूरा गर्दै फाइनलमा सोझै स्थान बनायो ।

एनपिएलमा सुदूरपश्चिम ब्याटिङ, बलिङ र फिल्डिङ तीनवटै पक्षमा बलियो देखिएको छ । र, उसले अहिलेसम्मका खेलहरुमा एकाँध गल्ती गरे पनि हरेक गल्तीलाई सुधार गर्दै उत्कृष्ट प्रदर्शन गर्दै आएको छ ।

जितमा नमात्तिएको सुदूर पश्चिम हारमा हताश भएन । जितपछि पनि ज्यानमा स्फूर्ति ल्याउन नसकेको जनकपुरले न जीतको रणनीतिलाई कायम राखिरहन सक्यो, न त हारबाट नयाँ रणनीति बनाउन सिक्यो ।

कतिपय खेलमा संयोगले, कतिपय खेलमा प्रतिस्पर्धी टीमको कमजोर प्रदर्शनले जनकपुरलाई हारका बाबजुद पनि अघि बढाउन मद्दत गरिरह्यो । एनपिएलको शुरुवातदेखि नै उत्कृष्ट लयमा देखिएको सुदूरपश्चिममाथि बिजय हात पार्न असम्भव हुने यसअघिका जनकपुरका खेलहरुको प्रदर्शनको स्मरणबाट अनुमान गर्न गाह्रो हुदैन । सुदूरलाई टक्कर दिन पनि जनकपुरले निकै मिहिनेत गर्नुपर्ने देखिन्छ ।

हारेर पटक पटक उठेको जनकपुर र प्रत्येक खेलमा पिटेर हावी भएको सुदूरपश्चिमबीचको अन्तिम खेलको व्यग्र प्रतिक्षामा छन्, दुबै टीमका समर्थकहरु । यो अन्तिम खेलमा दुबै टीमका समर्थकहरु थपिनेछन् । र, घर गईसकेका टोलीका समर्थकहरु यी दुई टीममा बाडिनेछन् ।

सुदूर पश्चिम रोयल्सका कप्तान दिपेन्द्र ऐरी र जनकपुरका कप्तान आसिफ शेखबीच शनिवार कीर्तिपुर मैदानमा फेरि भेट हुदैछ । सुदूरको बाघले जनकपुरका शेखलाई एनपीएलको उपाधीका लागि हुने अन्तिम खेलमा तेस्रो पटक स्तब्ध गर्ने समर्थकहरुको आशा छ । त्यसपछि फेरि भिड्न आउने छैन सुदूरपश्चिमसंग जनकपुर ।

यद्दपि सुदूरको तुफानले हुत्याएर दुई पटक किनार पुगेर मैदानको मध्यभागमा फर्किएको जनकपुरसंग अन्तिम आशा भने जीवितै छ ।

भिन्न संस्कृति, भिन्न भाषा भएका देशका दुई भूगोलका यी टिममध्ये उपाधी जसले जितेपनि त्यहाँ सुदूरको देउडा, छलिया र जनकपुरको जोगिरा र झिझीयाले उत्सव मनाउने छन् । यही त हाम्रो सुन्दरता ।

काठमाडौँ । जनकपुर बोल्ट्स नेपाल प्रिमियर लिग (एनपीएल) क्रिकेट प्रतियोगिताको फाइनलमा पुगेको छ।

आज बिहीबार भएको दोस्रो क्वालिफायर खेलमा कर्णाली याक्सलाई २ विकेटले हराउँदै जनकपुर बोल्ट्स फाइनलमा पुगेको हो।

जनकपुर बोल्ट्सले अब उपाधिका लागि सुदूरपश्चिम रोयल्ससँग भिडन्त गर्नेछ । फाइनल खेल शनिबार हुने छ।

कीर्तिपुरस्थित अन्तर्राष्ट्रिय क्रिकेट मैदानमा टस हारेर पहिले ब्याटिङ गर्ने निम्तो पाएको कर्णाली याक्सले निर्धारित २० ओभरमा नौ विकेट गुमाएर एक सय १८ रन बनाएको थियो।

जवाफी ब्याटिङमा ओर्लिएको जनकपुर बोल्ट्सले १९ ओभरमा आठ विकेट गुमाएर विजय लक्ष्य पूरा गर्यो ।

काठमाडौं । नेपाल प्रिमियर लिग (एनपीएल)को दोस्रो क्वालिफायरमा कर्णाली याक्सले जनकपुर बोल्ट्सविरुद्ध ११९ रनको लक्ष्य प्रस्तुत गरेको छ ।

बिहीबार कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको कर्णालीले निर्धारित २० ओभरमा नौ विकेट गुमाएर ११८ रनको योगफल खडा गरेको हो ।

कर्णालीका अलराउन्डर गुल्सन झाले सर्वाधिक ३५ रन बनाए । १७औँ ओभरको पहिलो बलमा मोहमद मोहसिनबाट बोल्ट हुनुअघि गुल्सनले २० बलमा एक चौका र दुई छक्का प्रहार गरे ।
ओपनर देव खनालले २० बलमा तीन चौका र एक छक्कासहित २४ रन जोडे । देवलाई छैटौँ ओभरको पहिलो बलमा जिम्मी निसमले आकाश त्रिपाठीबाट क्याच गराए ।

यसबाहेक, विलियम बोसिस्टोले १५ बलमा एक चौकासहित १४ रन बनाए । जिसान मक्सुदले ११ बलमा दुई चौकासहित १२ र चान्डविक वाल्टनले १३ बलमा एक चौकासहित ११ रन थपे ।

कर्णालीविरुद्ध जनकपुरका ललितनारायण राजवंशी, मोहमद मोहसिन र जिम्मी निसमले समान दुई विकेट लिए । चार ओभर बलिङ गरेका ललितले २२ रन खर्चिए । चार ओभर नै बलिङ गरेका मोहसिनले एक मेडन फ्याक्दै १४ रनमात्र खर्चिए ।

यसबाहेक, हर्ष थाकेर र शेर मल्लले समान एक विकेट लिए ।

जनकपुरविरुद्ध कर्णालीले १३ ओभरमा ६ विकेट गुमाएर ८५ रन बनाएको थियो । त्यसपछिका सात ओभरमा कर्णालीले ,, रनमात्र बनाउन सक्यो ।

प्रतियोगितामा जनकपुर लिग चरणको दोस्रो स्थानमा रहँदै प्लेअफमा आएको हो । तर, पहिलो क्वालिफायरमा सुदूरपश्चिम रोयल्ससँग हार बेहोरेपछि जनकपुरले दोस्रो क्वालिफायर खेल्नुपर्ने भएको हो ।

आजको खेलमा जित निकाल्ने टिमले उपाधिका निम्ति आउँदो शनिबार सुदूरपश्चिम रोयल्सविरुद्ध प्रतिस्पर्धा गर्नेछ । यसअघि सुदूरपश्चिमले पहिलो प्लेअफमा जनकपुरलाई आठ विकेटले निराश बनाउँदै फाइनल यात्रा तय गरेको थियो ।

लिग चरणबाट चौथो स्थानमा रहँदै प्लेअफमा आएको कर्णालीले भने इलिमिनेटरमा चितवन राइनोजविरुद्ध २१ रनको जित निकाल्दै दोस्रो क्वालिफायरमा स्थान बनाएको हो ।

काठमाडौं । एसिसी महिला यू-१९ महिला एसिया कपअन्तर्गत सुपर-४ को खेलमा नेपाल र श्रीलंकाबीचको खेलमा वर्षा बाधक बनेको छ।

जससँगै खेल रद्द भएको छ भने दुवै टोलीले एक एक अंक बाडेका छन्। जससँगै नेपाल सुपर-४ को अंक तालिकाको दोस्रो स्थानमा पुगेको छ।

नेपालले दुई खेलबाट दुई अंक जोडेको छ। तीन अंक जोडेको भारत शीर्ष स्थानमा छ। नकारात्मक रनरेट भएको तेस्रो स्थानको बंगलादेशको पनि २ अंक छ। श्रीलंका एक अंक जोडेर चौथो स्थानमा छ।

अब नेपालले भोलि सुपर-४ को अन्तिम खेलमा बंगलादेशसँग खेल्नेछ। जित निकाले नेपालले फाइनल खेल्नेछ। खेल रद्द भए पनि नेपाल फाइनल पुग्नेछ। हार भने नेपाल बाहिरिनेछ।

सुपर-४ का शीर्ष दुई टोलीबीच उपाधि भिडन्त हुनेछ।

बिहिबार मलेसियाको बायुमास क्रिकेट ओभलमा श्रीलंकाविरूद्ध टस जितेको नेपालले पहिले बलिङ गरेको थियो। नेपालले एक ओभरमा श्रीलंकाको एक विकेट लिएपछि खेल वर्षाले अवरुद्ध भएको थियो।

यसअघि समूह ‘ए’ को उपविजेताको रुपमा नेपाल सुपर-४ मा पुगेको थियो। समूहमा नेपालले पाकिस्तानलाई पराजित गर्दा भारतसँगको खेल वर्षाले रद्द हुँदा अंक बाडेको थियो।