जनकपुर बोल्ट्सले रोज्यो फिल्डिङ, सुदूरपश्चिम रोयल्स ब्याटिङ गर्दै

काठमाडौँ, २६ मंसिर ।
कीर्तिपुरमा जारी नेपाल प्रिमियर लिग (एनपीएल) को आजको पहिलो खेलमा सुदूरपश्चिम रोयल्सले पहिला ब्याटिङ गर्ने भएको छ ।
जनकपुर बोल्ट्सका कप्तान अनिल साहले बुधबार टस जितेपछि फिल्डिङ गर्ने निर्णय गरेपछि सुदूरपश्चिम रोयल्सले पहिला ब्याटिङ गर्ने भएको हो ।

यी दुई टीमबीचको प्रतिस्पर्धा एनपीएलका अहिलेसम्मका सबैखेलमध्ये रोमाञ्चक हुने अनुमान गरिएको छ ।

मंसिर १५ गते शुरु भएको एनपिएलको शुरुवाती चरणका खेलहरुको नतिजापछि क्रिकेटका दर्शकहरुमा दुई वटा टीमले गहिरो छाप छोडे । ती दुई टीम थिए, सुदूर पश्चिम रोयल्स र जनकपुर बोल्ट्स । धेरैको अनुमान गरे, फाईनलमा यी दुईटै टीमबीच प्रतिस्पर्धा हुनेछ । हुन पनि दुईटै टीमले लगातार तीन वटा खेलमा सहज जित हात पारे ।

आफ्नो चौथो खेलमा सुदूर पश्चिम रोयल्सले हार बेहोर्दा जनकपुर बोल्ट्स पनि चौथो खेलमा पनि अपराजित रह्यो ।

तीन खेलसम्म अंक तालिकामा छ अंक सहित शीर्षस्थानमा रहेको सुदूर पश्चिम रोयल्स चौथो खेलमा पराजित भएपछि दोस्रो स्थानमा झर्दा जनकपुर बोल्ट्स भने चौथौ खेलमा अबिजित हुदै ८ अंक जोडेर पहिलो स्थानमा उक्लियो ।

एनपीएल अन्तर्गत आज दुई खेल हुँदैछन् । जसमध्ये एनपीएलको उपाधीको दावेदार मानिएका सुदूर पश्चिम रोयल्स र जनकपुर बोल्ट्सबीच ९ः३० बजे शुरु भएको हो ।