नेपाल टेलिकमले सुदूरपश्चिम रोयल्सलाई प्रायोजनमा सहयोग गर्ने सम्झौता

काठमाडौँ, ६ मङ्सिर । नेपाल प्रिमियर लिग (एनपीएल) टोली सुदूरपश्चिम रोयल्सलाई नेपाल टेलिकमले प्रायोजन सहयोग गरेको छ ।

एनपीएलमा सुदूरपश्चिमलाई टेलिकमले टेलिमकम पार्टनरको रुपमा सहयोग गरेको हो । दुई पक्षबीच प्रायोजन सहयोगसम्बन्धी सम्झौता पत्रमा हस्ताक्षर भएको छ ।

सम्झौता पत्रमा सुदूरपश्चिम रोयल्सका प्रमुख कार्यकारी अधिकृत (सिईओ) प्रकाश खड्का र नेपाल टेलिकमकी प्रबन्ध निर्देशक सङ्गीता पहाडीले हस्ताक्षर गरिन ।

सम्झौतापछि सिइओ खड्काले टेलिकमको साथप्रति आभार व्यक्त गर्दै क्रिकेट विकासमा रोयल्सले महत्त्वपूर्ण भूमिका खेल्ने बताए ।
खड्काले नेपाल टेलिकम यसअघि पनि नेपाली क्रिकेटलाई सहयोग गर्दै आएको र यसपटक रोयल्सलाई सहयोग गरेकोमा मैदानभित्र उत्कृष्ट प्रदर्शन गरेर टेलिकमलाई गौरव महसुस गराउन तत्पर रहेको बताए ।

प्रबन्ध निर्देशक पहाडीले नेपालको खेलकुद क्षेत्रको वृहत्तर विकासका लागि नेपाल टेलिकमले सदैव योगदान दिदैँ आएको एवं नेपाली क्रिकेटसँग पनि लामो समयदेखि जोडिइरहेको स्मरण गर्दै सुदूरपश्चिमाञ्चल रोयल्स मार्फत एनपीएलमा जोडिन पाउँदा खुसी लागेको बताईन् ।

नेपाल क्रिकेट सङ्घ (क्यान) क्यानको‌ आयोजनामा मङ्सिर १५ देखि पुस ६ गतेसम्म हुने एनपीएलमा आठ टोलीको सहभागिता रहनेछ ।