गौशाला धर्मशाला विवाद चर्किएपछि पर्यटनमन्त्रीले बोलाए पशुपति विकास कोषको बैठक
काठमाडौँ । गौशाला धर्मशालासम्बन्धी विवाद चर्किएपछि संस्कृति, पर्यटन तथा नागरिक उड्डयनमन्त्री बद्री पाण्डेले पशुपति क्षेत्र विकास कोषको बैठक बोलाएका छन् ।
साथै, मन्त्रालयले धर्मशाला खाली गर्ने कार्य अर्को निर्णय नभएसम्मका लागि रोक लगाउन पनि पत्र पठाएको छ । कोषले असोज २३ मा गृहमन्त्रालयलाई शान्ति सुरक्षा व्यवस्था मिलाइदिन माग गर्दै पत्राचार गरेको थियो ।
पशुपति क्षेत्र विकास कोषका अध्यक्षसमेत रहेका उनले असोज ३० गते ‘शान्ति सुरक्षामा समस्या उत्पन्न भएको’ भन्दै कोषलाई गरेको पत्राचारमा पशुपति गौशाला धर्मशाला खाली गराउने काम रोक्न निर्देशन दिएका छन् ।
साथै उनले यही कात्तिक ४ गते परिषद् बैठक संस्कृति, पर्यटन तथा नागरिक उड्डयन मन्त्रालयमा आह्वान गरिएको कोषका प्रवक्ता रेवतीरमण अधिकारीले बताएका छन् ।
कोषले आफ्नो पूर्ण स्वामित्वमा रहेको राज्यको सम्पत्ति धर्मशालालाई कुनै व्यक्ति वा व्यापारिक समूहलाई सञ्चालन गर्न नदिने बरु गैरनाफामूलक ढङ्गले काठमाडौँ महानगरपालिकासँगको सहकार्यमा सञ्चालन गर्ने भनेपछि विवाद सुरु भएको हो ।
यता धर्मशाला सञ्चालन गर्ने आएको मारवाडी सेवा समिति कोषको उक्त निर्णयको विरोधमा उत्रिएको छ । समितिले आफूहरुले ८३ बर्षदेखि धर्मशाला सञ्चालन गर्दै सामाजिक कार्यहरु गर्दै आएको बताउँदै धर्मशालामाथि आफूहरुको मोहियानी हक रहेको बताउँदै आएको छ ।
ट्रेन्डिङ
सम्बन्धित
